என் பக்கம்

முஸ்லிம்களின் தாடி..

முடிச் சுமக்கும்
முகத்திற்கு மதம்
கொண்டு பொய் முகச்சாயம்
பூசும் பெருச்சாளிகள்!

அறிவாளிகள் கொண்டது எனக்

பெரியாரைக் காட்டுவர்;

தீவிரவாதிகள் என

இஸ்லாமியரைக் காட்டுவர்!

கால் கொண்ட என் ரோமத்திற்கு;

எதிரிக் கால் இரண்டும் ஆடும்;

என்னிடம் அணு ஆயுதம்

இல்லாமலே அணு அணுவாய் சாகும்!

கத்தரித்த தாடிக்கு

கதிரியக்கங்கள் குவியும்;

அனைத்து நிலையமும்

சோதனைச் சாவடியால் நிறையும்!

ஏற்றத்தாழ்வுப் பார்வையால்

பூசுகிறாய் சாயம்;

முஸ்லிம் என முணுமுணுத்து

ஒதுக்குகிறாய் என்ன நியாயம்!

மலடி..

வருடம் ஏற

வயதும் ஏற

கருமுடிகள்

வெளிறி வெள்ளைக்காகக்

காத்திருக்கின்றன!

சில்லுக்கோடு

விளையாடியவர்களெல்லாம்

சின்னச்சிறு வாண்டுகளோடு!

திடமான மனமிருந்தாலும்

வடுவாகிப் போகும்;

நொந்துப்போகும் மனம்

வந்துப்போகும் உறவினர்களால்!

கட்டிச்சென்ற நீ

விட்டுச்சென்றாய்;

மலராதத் தாய்மையால்

மலடி என்றப் பட்டம்!

மணம் முடித்து

வருடம் பல ஆனாலும்;

விரல்விட்டுச் சொல்லும்

உன் விடுமுறைக்குப்

பலிக்கடாவாய் நான்;

பாலையில் நீ!

மாதச் சம்பளம்

உழைப்பிற்கு ஊதியமாய்

களைப்பிற்கு உற்சாகமாய்

மாதச்சம்பளம்;

வாங்கியதும் வீங்கிய

கடமைக்குத் தீனியாய்!

கட்டிப்பிடித்து ஒட்டிப் பார்த்தாலும்

ஒட்டாமல் ஒடும்

ஒட்டப்பந்தய சூரனாக!

மலறும் முகம்

மணிக்கணக்கிற்குத்

தாங்காது;

”மணி”யும் என்

கணக்கிற்கேப் போகாது!

கர்ணம் போட்டு வண்ண

வண்ணமாய் கனவுகள்

கண்டாலும்;

தங்காது தங்கம்

விற்கும் விலைக்கு!

எப்போதாவது ஏறும் சம்பளம்;

ஒட்டிபிறந்த உடன்பிறப்பாய்

கூடவே என் தேவைகளும்!

ஆறுதலாய் பணம் அனுப்பிய

ரசீது மட்டும் என் கையில்!

திணிக்கப்பட்டதாய் எண்ணும்
திரையிட்டக் கண்கள்;
விலகி நின்றுப் பார்ப்பதால்
குறுகலாய் தோணும்!

வெட்ட வெளிச்சத்தில்
குட்டைப் பாவாடையில்;
குறுக் குறுக்காதப்
பார்வைகள் - எங்களை
அருவருப்பாய் பார்க்கும்!

சுதந்திரமான ஆடையென
எண்ணி விலங்கிடப்பட்ட
பெண் கைதிகள்;
திரைக்குள் இருந்தாலும்
சிறையில்லை எங்களுக்கு!

கட்டுப்பட்ட ஆடைகள்
குட்டு வைக்கும் ஆண்களுக்கு;
மூடியிருந்தாலே விழித்துப்பார்க்கும்;
திறந்திருந்தால் கற்பழிக்கும் கண்கள்!

என் உரிமை இதுவென்று
முடிவு செய்ய நான் என்ன
உனக்கு அடிமையா;
திறந்துக் காட்டி
உன்னைக் குதுகலிக்க
நான் என்ன மடமையா!

எச்சில் ஊறும்
உன் விழிகள்
கொத்திச் செல்லும் பருந்து;
திறந்துக் காட்ட நானில்லை
உனக்கான விருந்து!